معييش فلوس اصرف والفن غدر بيا.. نجوى فؤاد في حالة صعبة والسبب مفاجأة «فيديو»
محمد إيهاب عزب
تصدرت الفنانة نجوى فؤاد، تريند السوشيال ميديا، ومحرك البحث حوجل خلال الساعات القليلة الماضية، وذلك عقب تصريحاتها الأخيرة، التي تحدثت خلالها عن خروجها من الوعكة الصحية التي ألمت بها. ودخلت بسببها المستشفى وأجرت فحوصات طبية.
قالت نجوى فؤاد: «أنا اتعرضت لوعكة صحية عادية وعملت إشاعة على رجلي والقطانية لكن الي جاي بقى هو الي يخليك تعرف قد ايه الفن ده غدااااااااااار، لجأت للنقابة من شهرين أو تلاتة، علشان يساعدوني الكشف والعلاج، والنقابة معندهاش استعداد غير لعلاج بسيط وتحاليل، والجمهور مبيشوفنيش على الساحة خالص علشان لأني مش قادرة أقاوم أني أقف وألبس واتمكيج وأظهر بلياقتي العادي، مش قادرة الحقيقة».
وتابعت: «معاش النقابة 600 جنيه بس، وأشرف زكي مالوش ذنب هو موظف في الأول والآخر، وأنا مكنش عندي رد غير أني أقوله أشوفك بخير وبشكره أنه اهتم بيا واتصل بيا، و أشرف زكي عرض عليا أني أخد من فلوسه الخاصة لو محتاجة، قولتله لأ مستورة لغاية دلوقتي».
وأضافت الفنانة نجوى فؤاد: «أنا معنديش مصدر دخل خالص، ودي حاجات بتبقى خاصة مقدرش أتكلم فيها والحمد لله مستورة، والفن غدار وكل مهنة غدارة، والفن بيحب الفنان يكون بيبرق على طول وحالته السليمة على طول، وساعات بيكون في مطبات بيقع فيها الإنسان بتكون بإيد ربنا».
واستطردت: «أنا معتزلة الرقص بقالي 17 سنة، ولكن مش هعتزل التمثيل، وبيجيلي أدوار ولكني مش قادرة أقدم عمل جيد وأكون واعية من غير مسكنات وحقن، مش عايزة أتعب المنتج اللي بياخدني أجي أقوله في النص أنا تعبانة مش قادرة أكمل، والفن ولا أي شغلانة مفيش فيها كلمة أنا تعبان، وربنا قسملي الرقص ونجحت فيه، وربنا أراد أنه ينجحني في الرقص وشُفت فيه كل الأيام الحلوة، وحب الجمهور أكبر ثروة بالدنيا».
وأنهت تصريحاتها: «إن شاء الله ربنا يشفيني وألتقي بـ جمهوري في عمل فني يعوض اللي فات»
