جنون ميبو: ارتفاع الأسعار ونقص المنتج في الصيدليات
ميبو.. ضحية الشائعات: ارتفاع الأسعار ونقص المنتج بسبب سوء الاستخدام
كتب- سارة جمعة
بعد الترويج له على وسائل التواصل الاجتماعي ..ارتفاع سعر مرهم «ميبو» وتحذيرات من الأطباء
يعتبرمرهم ميبو، من أشهر المراهم الطبية المستخدمة لعلاج الحروق والجروح، حيث أثبت فعاليته في تسريع عملية الشفاء وتحفيز التجدد الخلوي، ومع مرور الوقت، شهد سعر هذا المنتج ارتفاعًا ملحوظًا في الأسواق، تزامن مع اختفائه المفاجئ من بعض الصيدليات، وفي حين يفترض أن هذا المرهم مخصصًا للاستخدامات العلاجية فقط، تزايدت في الآونة الأخيرة شائعات وأخبار عن استخدامه كفاتح للبشرة ومعالج للبقع الداكنة، ما أدى إلى تصاعد الطلب عليه بشكل غير طبيعي، وهو ما ساهم في نقصه وارتفاع أسعاره حتى بلغت سعر الأنبوبة الصغيرة 109 جنيها.
ارتفاع سعر مرهم «ميبو» وتحذيرات من الأطباء
وقالت بسمة محمود، صيدلانية، «أنا مش فاهمة ليه الناس بتستخدم ميبو على الوش»، يعني ده مرهم للحروق والجروح وليس كريم تجميل، في ناس محتجاه أكتر عشان الحروق والحالات الخطيرة ومش لاقياه،عشان في ناس قررت تعمل ترند وتستخدمه لأغراض تانية، لافتة إلى أن علبة ميبو اللي كانت بـ 30 أو 40 جنيه بقت بـ 109 جنيه لو لقيتها أصلًا.
نسرين فريد، موظفة، أنا كنت بستخدمه لحروق بسيطة في ايدي، وكان ممتاز، لكن دلوقتي سعره ارتفع بشكل مبالغ، ومش لاقياه في الصيدليات، منوهة عن عدم اقتناعها إن ميبو له أي فوائد للبشرة أو لتفتيحها زي ما بيقولوا، المرهم ده مخصص للحروق فقط، ولا له علاقة بالترطيب أو التفتيح زي ما بيتم ترويجه في السوشيال ميديا.
خلود محسن، موظفة «الناس اللي استخدمت ميبو عشان تفتيح البشرة بتهدر حق الناس اللي في احتياجه»، هو مش كريم تفتيح ولا بيفتح ولا بيرطب، هو فقط علاج للحروق والجروح، بيحتوي على مكونات معينة مفيدة في التئام الجروح سريعا، متابعة ،دلوقتي حتى لو لقيت العلبة في الصيدلية، مش هشتريها لأنها بقت غالية جدًا، الناس اللي قررت تستخدمه في أشياء أخرى، جعلت المنتج يقل من الأسواق.
من جانبها كشفت الدكتورة علا حسام،أخصائي الأمراض الجلدية والتجميل، أن مرهم ميبو يستخدم لعلاج الحروق والجروح فقط، مشيرة إلى أن المكونات التي يحتوى عليها ميبو قوامها ثقيل جدا على البشرة لأنه يعمل طبقة عازلة على الجلد المصاب حتى لا يتعرض للجراثيم والبكتيريا، مما يساعد على التئامه، ومن الأفضل مراجعة الطبيب قبل استعماله، لتحديد عدد مرات استخدامه على مدار اليوم، لأن الإفراط في استخدامه سيكون له تأثيرات عكسية، خاصة على أصحاب البشرة الدهنية والمختلطة.
