«قريب من نوبل».. عالم مصري يحقق إنجازًا علميًا يغير تاريخ الفيزياء.. ما القصة؟! «فيديو»

أدهم عثمان

العالم المصري محمد حسن، أستاذ الفيزياء والعلوم البصرية في جامعة أريزونا الأمريكية ، نجح هو وفريقه العلمي في ابتكار أسرع مجهر إلكتروني في العالم، المجهر ده بيقدر يصور الإلكترونات وهي بتتحرك بسرعات عالية جداً، وده إنجاز ضخم وغير مسبوق في علوم الفيزياء.

مجلة “ساينس أدفانس” قالت إن الابتكار ده هيفتح الباب لتطورات كبيرة في الفيزياء والكيمياء والهندسة الحيوية وغيرها من المجالات. وده لإن المعروف عن الإلكترونات أنها بتتحرك بسرعة رهيبة، ممكن توصل لـ2200 كيلومتر في الثانية جوا الذرة..

ولما السرعة بتزيد بفعل مجال كهربائي، بتوصل لـ6000 كيلومتر في الثانية، وفي الأماكن اللي فيها طاقة عالية زي مسرعات الجسيمات، الإلكترونات ممكن تقرب جداً من سرعة الضوء وتوصل لـ99.9% من سرعة الضوء.

الدكتور محمد حسن صرّح في مقابلات صحفية إن المجهر الجديد ده هيخلي البشر تشوف حاجات مكانش ممكن نشوفها قبل كده، أهمها حركة الإلكترونات.

جامعة أريزونا نشرت بيان رسمي بتشرح فيه طريقة عمل المجهر ده، المجهر بيشتغل عن طريق إصدار نبضات بسرعة فائقة جداً، والنبضات دي بتكون سلسلة من الصور اللي العلماء بيجمعوها مع بعض عشان يعملوا زي فيلم يوثق حركة الإلكترونات.

المجاهر دي بتوصل سرعات النبضات لحد الأتوثانية، واللي هي جزء من كونتيليون جزء من الثانية،والكونتيليون هو رقم 1 وأدامه 18 صفر.

وده اللي خلاهم يقدروا يشوفوا الإلكترون الواحد لأول مرة، لأنهم قدروا يولدوا نبضة إلكترونية بسرعة الأتوثانية، اللي هي نفس سرعة حركة الإلكترون، وده زي إنك تعلي سرعة الكاميرا عشان تقدر تصور لاعب كرة وهو بيجري فتخليه باين كأنه واقف.

من ضمن الإنجازات اللي حققها الدكتور محمد حسن إنه في 2016 قدر يطور جهاز ينتج أول نبضة ضوئية في الثانية، وده خلاه يدخل موسوعة جينيس للأرقام القياسية كأسرع نبضة ضوء مرئي في العالم.

وباستخدام الجهاز ده، قدر يقيس الوقت اللي الإلكترون بياخده عشان يستجيب لحقل الضوء الخارجي، والنتائج دي اتنشرت في مجلات عالمية زي “نيتشر” و”ساينس”.

وعلى مدار السنين اللي فاتت، الدكتور محمد حسن حصل على جوائز كتير، زي جائزة منحة مؤسسة جوردون وبيتي مور سنة 2018، وجائزة القوات الجوية للمحققين الشباب سنة 2019، وفي 2022 حصل على جائزة مؤسسة كيك الأمريكية بقيمة 1.1 مليون دولار لدعم أبحاثه.

فهل يا ترى ممكن نشوف من جديد جائزة نوبل بعد السادات ونجيب محفوظ وأحمد زويل بتتسلم في القريب العاجل ومرفوع جنبها علم مصر ؟!

شاركونا الرأي في التعليقات.