أكد الفنان يحيى الفخراني أهمية تفعيل حق الأداء العلني في الأعمال الفنية، معتبرًا أنه من أهم الحقوق التي يجب أن يحصل عليها الفنان، بل ويفوق في أهميته الجوائز المادية أو التكريمات، قائلًا: هو أهم من الجوائز، سواء المادية أو التكريمات، لأنها في النهاية تُعلق على الجدران.

وأضاف، خلال مداخلة هاتفية ببرنامج الصورة الذي تقدمه الإعلامية لميس الحديدي: أنا عاصرت ابن الفنان القدير إسماعيل ياسين، ووالدته ذات يوم هاتفتني وطلبت مني أن أبحث له عن عمل أي شغل أنتوا متخيلين إن ده ابن الفنان القدير إسماعيل ياسين؟!،هو ده اللي كانت الناس بتستناه على المحطات، والمنتجون يجروا عليه علشان يشتغل في أفلامهم؟.

وأكمل: هذا الجيل السابق لم يكن واعيًا بالدرجة الكافية، لكن الأجيال التي جاءت بعدهم أصبحت أكثر وعيًا، وأنا منهم وبدأت آخد بالي لما اشتغلت مع الراحلة فاتن حمامة، قالت لي: خلي بالك، لازم الفلوس اللي بتاخدها تحوش نصها، لأن الزمن غدار.

وواصل: لما بشوف حاجة زي كده بيصعب عليا الوضع فيه  ناس اشتغلت، وناس مش لاقية شغل، وبتعاني، وأقل مثال على ده ابن إسماعيل ياسين، لما والدته كلمتني وقالت لي: شوف له أي شغل.

وردًا على سؤال الإعلامية لميس الحديدي بشأن وجهة نظر بعض صُنّاع الدراما والسينما بأن تطبيق حق الأداء العلني قد يمثل عبئًا على الصناعة، علّق قائلًا: لا يؤثر على الصناعة، لأن الحقيقة أنا شخصيًا جربت ده عمري ما طلبت أجر، وكان المنتج هو اللي يجي يقولي: هزودك عن الدور اللي فات علشان توافق تشتغل معايا، ويتحايل عليا. ولما بيديني أجر زيادة، هو بيكون عامل حسابه، وبياخده من أول عرض في النهاية المنتج مش بيدي لله، دي تجارة، عرض وطلب، وبيحسبها كويس.

واختتم قائلًا: ده شيء مش مخترع، نشوف الخواجة بيعمل إيه ونعمل زيه.